میں راہ میں ہوں گنبدِ خضرا ہے نظر میں

میں راہ میں ہوں گنبدِ خضرا ہے نظر میں

منزل بھی ہے گویا مرے ہمراہ سفر میں

---

سب اُنؐ کی ہی توصیف ہے والّیل کہ والّشمس

تاب اُنؐ سے شبِ تار میں نُور اُنؐ کا سحر میں

---

تھی کتنی زمانے کو ہدایت کی ضُرورت

آپؐ آئے فضا ڈوب گئی جذب و اثر میں

---

انسان کی عظمت کا سفر ہے شبِ اسریٰ

معراج اضافہ ہے مُہّماتِ بشر میں

---

ہے اپنے غلاموں سے انہیں ؐ کیسا تعلّق

کھِنچ آیا ہے اُس دَر کا اجالا مرے گھر میں

---

بڑھتے ہیں حضُوری میں غلاموں کے مراتب

میں خُود تو نہیں اب مری منزل ہے سفر میں

---

اُس نام کی حُرمت کو رگ و پے میں اتاروں

اُس ذِکر کے انوار نظر آئیں نظر میں

---

اے کاش کسی روز خد و خال میں ڈھل جائے

اک شکل سی پھرتی ہے مرے دیدۂ تر میں

---

غفلت کا یہ عالم ہے کہ یہ بھی نہیں احساس

ہم کتنے سبک ہو گئے آقاؐ کی نظر میں