فرازِ عرش پر رکھی ہوئی تصویر کس کی ہے

فرازِ عرش پر رکھی ہوئی تصویر کس کی ہے

وہ اُمّی ہے تو پھر غارِ حرا تحریر کس کی ہے

---

تصور جگمگاتا ہے ہمارے چار سُو کس کا

ہمارے ہر طرف مہکی ہوئی تنویر کس کی ہے

---

خزانے رحمتوں کے وہ لُٹاتا ہے سرِ محفل

کوئی دامن نہ پھیلائے تو یہ تقصیر کس کی ہے

---

گُلوں کی پتیاں ہیں یا ہے اُس کا اسوۂ حسنہ

جسے لکھا گیا خوشبو سے وہ تفسیر کس کی ہے

---

اُتر جاتے ہیں لوگوں کے دلوں میں لفظ کیوں انجؔم

مری بے ساختہ تحریر میں تاثیر کس کی ہے