ہر عہد ہر مقام کے سلطان آپؐ ہیں

ہر عہد ہر مقام کے سلطان آپؐ ہیں

خوشبو ہے جس کا جسم وہ انسان آپؐ ہیں

---

ہر معتبر کتاب ہے منسوب آپؐ سے

ہر معتبر کتاب کا عنوان آپؐ ہیں

---

وہ پیکر جمیل ہے پہچان آپؐ کی

اُس پیکر جمیل کی پہچان آپؐ ہیں

---

دم توڑ دے اگر ہو جُدا آپؐ سے زمیں

سب سے بڑے زمین کے مہمان آپؐ ہیں

---

چُپ ہوں تو جیسے کعبہ کھڑا ہو نماز میں

بولیں تو حَرف حرف ہی قرآن آپؐ ہیں

---

دیکھا نہیں کسی نے جسے آپؐ کے سوا

اس لازوال حُسن کی برہان آپؐ ہیں

---

رکھ کر میں صبح و شام دُعاؤں کی رحل پر

پڑھتا ہوں جس کو روز وہ قرآن آپؐ ہیں

---

انجم پہ رحمتوں کی نوازش ہو بار بار

اُس کے لیے تو سُورۂ رحمان آپؐ ہیں