ہر ویلے عرضاں کردا ہاں سرکار مدینہ ویکھ لواں
لگ دا اے جتھے اللہ دا دربار مدینہ دیکھ لواں
ناں عیش بہاراں منگدا ہاں ناں لمیاں عمراں منگدا ہاں
فیر کڈھ لیں جان میرے مولا اک وار مدینہ ویکھ لواں
پے درداں دا مُل جاوے گا ہر اتھرو بن پُھل جاوے گا
لے اپنے نال جے ہنجواں دے سب ہار مدینہ ویکھ لواں
ودھ سب توں اَوگنہارا ہاں مجرم تے پاپی بھارا ہاں
کملی دے تھلے لُک جاساں جے یار مدینہ ویکھ لواں
اللہ جے کرم کما دیوے جے سُتے لیکھ جگا دیوے
میں وار کے مدنی ماہی توں گھر بار مدینہ ویکھ لواں
میں جھلا ہاں دل جھلا اے عملاں توں خالی پلا اے
ہو جان قبول جے نعتاں دے اشعار مدینہ ویکھ لواں
آساں دا گلشن کھل جاوے سب صائم مقصد مل جاوے
جے مرن توں پہلاں رحمت دی گلزار مدینہ ویکھ لواں
شاعر کا نام :- علامہ صائم چشتی
کتاب کا نام :- کلیات صائم چشتی