میرے سنِ شعور کی جب سے کُھلی ہے آنکھ

میرے سنِ شعور کی جب سے کُھلی ہے آنکھ

تب سے مدینہ شہر کی جانب لگی ہے آنکھ

---

شہرِ نبی سے لَوٹتے ، زائر کو دیر تک

جھپکے بغیر دیکھتی رہتی رہی ہے آنکھ

---

فضلِ خُدا سے شہرِ مدینہ پہنچ گیا

روضے کو اِنہماک سے اب تک رہی ہے آنکھ

---

یہ فرطِ انبساط میں ، روضے کو دیکھ کر

جانے یہ کتنی دیر برستی رہی ہے آنکھ

---

کیف و سرور سے ہوا معمور میرا دل

جب گُنبدِ حسین پہ جا کر لگی ہے آنکھ

---

جس نے کہ ایک بار بھی دیکھا حضور کو

کب پھر بھلا وہ دوسری جانب اُٹھی ہے آنکھ

---

جلوہ دکھانے آئیں گے آقا ، مرے ضرور

وقتِ نزع بھی راستہ تکتی رہی ہے آنکھ

---

تشنہ لبی قرار میں فوراً بدل گئی

جُوں ہی رُخِ حضور پہ میری لگی ہے آنکھ

---

الحمد ! میں کھڑا ہوں مواجہ کے سامنے

جس کے لئے جلیل ترستی رہی ہے آنکھ