حبِ نبیؐ اگر ترے سینے میں نہیں ہے

حبِ نبیؐ اگر ترے سینے میں نہیں ہے

پھر کوئی بھلائی ترے جینے میں نہیں ہے

---

جُود و کرم ، عطا کے خزانے ہیں بے بہا

موتی ہے کونسا جو خزینے میں نہیں ہے

---

موسم ربیعِ نور کا کرتا ہے شادماں

یہ بات کسی اور مہینے میں نہیں ہے

---

چارہ گری ہے شیوئہ سلطانِ دوجہاںؐ

بے چارگی کا خوف مدینے میں نہیں ہے

---

سنتے ہیں دو کریم حضوری کی التجا

حرفِ دُعا اگرچہ قرینے میں نہیں ہے

---

طیبہ کے پتھروں کو ملی ہے جو دل کشی

وہ بات کوہِ نور نگینے میں نہیں ہے

---

مُشکِ خُتن ، عبیر ، چنبیلی ، گلاب و عود

خوشبو ہے کون سی جو پسینے میں نہیں ہے

---

اک رنج و اضطراب ہے اس دل میں موجزن

اشفاقؔ مدینے کے سفینے میں نہیں ہے