اک نور سا تا حدِ نظر پیشِ نظر ہے

اک نور سا تا حدِ نظر پیشِ نظر ہے

میں اور مدینے کا سفر پیشِ نظر ہے

---

ہر چند نہیں تاب مگر دیکھیے پھر بھی

وہ مطلعِ انوارِ سحر پیشِ نظر ہے

---

جو میرے تخیّل کے جھروکے میں کہیں تھا

صد شکر و مقصودِ نظر پیشِ نظر ہے

---

بخشش کا وسیلہ ہے ہر اک اشکِ ندامت

کچھ خوف ہے باقی نہ خطر پیشِ نظر ہے

---

اس بارگہِ ناز کا صد رنگ نظارہ

ہر آن بہ اندازِ دگر پیشِ نظر ہے

---

ہر چند سوئے کعبہ ہیں سجدے مرے لیکن

وہ قبلہء ہر اہلِ نظر پیشِ نظر ہے

---

گو فردِ عمل میری گناہوں سے بھری ہے

ہر لحظہ کرم ان کا مگر پیشِ نظر ہے

---

کیا بام و درِ خُلد نگاہوں میں جچیں گے

فردوس کے سردار کا در پیشِ نظر ہے

---

مانگی تھیں جو بادیدۂ تر میں نے دعائیں

ایسی ہی دعاؤں کا اثر پیش نظر ہے

---

شاکر مجھے لمحاتِ حضوری ہیں میسّر

آرامِ دل و نورِ نظر پیشِ نظر ہے