جبینِ شوق بلاوے کے انتظار میں ہے

جبینِ شوق بلاوے کے انتظار میں ہے

مری حضوری ترےؐ دستِ اختیار میں ہے

---

کروڑوں چاند ستارے ملا کے ہو نہ سکے

جو رنگ و نور مدینے کے ریگزار میں ہے

---

ہمارا جسم ہے ریگِ عجم سے آلودہ

ہماری رُوح مگر آپؐ کے دیار میں ہے

---

جسے تلاش ہے مدت سے تیریؐ چوکھٹ کی

وہ ایک سجدہ مری چشمِ اشکبار میں ہے

---

چھٹے گی گرد کبھی تو مدینہ دیکھیں گے

مرا نصیب ابھی گرد میں، غبار میں ہے

---

یہی خیال تو اشفاقؔ رُوح پرور ہے

سیاہ کار سہی آپؐ کے شمار میں ہے