جدوں وقت رحلت نبی دا سی آیا
جدوں آپ نے جانا دُنیا توں چاہیا
صحابہ نوں سرکار فرمان لگے
شانِ رحمت سی دِکھلان لگے
میرے دوستو ، ساتھیو میرے یارو
میرے غمگسارو میرے جاں نثارو
اساں نوں خُدا نے بُلایا اے یارو
تے ویلا جدائیاں دا آیا اے یارو
بڑی مہربانی ہے میرے تے رب دی
میں منگدا پیا ہاں سدا خیر سب دِی
کدی ظلم نہیں میں کسے تے کمایا
کدی نہیں میں یارو کسے نوں ستایا
مگر فیر بھی سُن لئو ایہہ فرمان ساڈا
پہنچا دیود گھر گھر چ اعلان ساڈا
کسے نوں جے ساتھوں ہے تکلیف آئی
کسے نوں جے بے رنج ساڈے تے کائی
اوه پیچھے اساڈے کرے نہ شکایت
لوے اجو بدلہ کرے نہ رعایت
ایہہ سُن کے تڑپ اُٹھے سارے صحابی
مہاجر تے انصار عجمی اعرابی
زمین لرز اُٹھی زمان لرز اُٹھے
مکیں کنب گئے سی مکاں لرز اُٹھے
گلستاں چہ ہر اک کلی رون لگ پئی
مدینے دی ہر اک گلی رون لگ پئی
زمانے دے سب بحر و بر رون لگ پئے
مدینے دے دیوار و در رون لگ پئے
ہے غم دے نعرے ہی لاؤندے صحابی
تے اک بندہ اوندا اے اگے شتابی
صحابی سی اوہ وی تے ناں سی عکاشہ
پیا اوہ وی سی رووندا بے تحاشہ
سی معروض ہویا اوہ اتھرو بہا کے
گہن لگا سوہنے نوں نظراں جُھکا کے
تساڈا میں سرکار فرمان سُن کے
تے بدلے دا آج عام اعلان سُن کے
عجب واقعہ اک سناندا ہاں آقا
میں بدلہ تُساڈے توں چاہندا ہاں آقا
جاں اک وار ہندی پئی سی لڑائی
تُساں کولوں مینوں سی تکلیف آئی
تسیں اودوں کوڑا چلاندے سو آقا
تے دشمن دے چھکے چھڑاندے سو آقا
جاں اک وار کوڑا تُساں سی چلایا
میرا جسم کوڑے دی زد وچہ سی آیا
میں چاہندا ہاں کوڑا تُساں نوں اوہ ماراں
تے انج آپ توں اوہدا بدلہ اتاراں
تڑپ پئے صحابی ایہہ تک کے تماشہ
تے کہندے نے کی تینوں ہویا عکاشہ
ایہہ بدلے دی کی تینوں پئی اے عکاشہ
تیری مت ماری گئی اے عکاشہ
بنی پر ہے جس دے لئی سب خُدائی
اہدے نہیں شکن تک وی متھے تے آئی
اوہ ہس کے عکاشہ نُوں فرمان لگے
تے انج شان انصاف دکھلان لگے
توں جلدی عکاشہ اوہ بدلہ اُتاریں
تے کوڑا آساڈے بدن تے اوہ ماریں
صحابہ نوں فرمایا سوہنے نے جاؤ
تے زہرا دے کولوں اوہ کوڑا لیاؤ
تڑپدا ہویا اک صحابی ہے جاندا
تے زہرا نوں سارا اے قصہ سناندا
ایہہ سُن کے تڑپ پئی محمد دی جائی
اوہ تڑپی تے تڑپی خُدا دی خُدائی
سی دیتا صحابی نوں کوڑا لیا کے
تے کیہیا حسین و حسن نوں بُلا کے
میرے لال نانے دی خدمت چہ جاؤ
ایہہ میرے تے ویلا اے کم میرے آؤ
چلو پیش جا کے بدن اپنے کرنا
تے نانے دے قدماں تے سر جا کے دھرنا
جہنے بدلہ لینا اوہنوں جا کے کہنا
اساڈے توں لے جیہڑا بدلہ توں لینا
اوہنوں کہنا اک بدلے سو کوڑا لالے
اوہنوں کہنا ساڈا توں چمڑا اُڈالے
قصاص اوہنوں کہنا اسیں ایہہ بھراں گے
شفاعت وی محشر نوں تیری کراں گے
کہیو اوہنوں بیمار ہے ساڈا نانا
تے جھلن گے کیویں تیرا تازیانہ
کہنا صدمہ کیویں ایہہ زہرا جرے گی
کہیؤ سُن کے بیٹی نبی دی مرے گی
چلو جاؤ دوڑو تے جلدی تھیں جاؤ
اوہ اک کوڑے بدلے جنے مارے کھاؤ
ایہہ سُن کے تے شہزادے دوڑے نے جاندے
تے جا کے نے ترلے عکاشہ دے پاندے
بدن پیش کر کے تے گردن نواندے
عکاشہ نوں کر کر کے منتاں مناندے
صحابہ نے وی زور سارا اے لایا
عکاشہ نوں پر رحم ماسہ نہیں آیا
ایہ تک کے تے فرمایا خیر الوری نے
رسُولِ دو عالم نبی مصطفے نے
عکاشہ توں چھیتی کم نوں مکا لے
جیویں تیرا جی کردا کوڑے لگا لے
نویں شرط سی پھر عکاشہ نے لائی
ادب نال پھیر ایہہ گذارش سُنائی
مرا انج بدلہ اے رہندا ادھورا
میں چاہندا ہاں آقا لواں بدلہ پورا
سی جد مینوں لایا تُساں تازیانہ
میری پشت ننگی سی شاہ زمانہ
کرو پشت ننگی تے کوڑا میں ماراں
تے انج بدلہ پورے دا پورا اُتاراں
ایہہ سُن کے صحابہ دی ہاہ نکل گئی سی
نے فوراً قمیض آپ نے چا لئی سی
جاں کُرتا سی مہر نبوت توں چایا
سی ہر پاسے اک نور ہی نور چھایا
عکاشہ نے جھٹ ہتھوں سُٹ تازیانہ
لیا چُم منور محمد دا شانہ
خُداوند عالم دی رحمت نوں چُم کے
سی مڑیا اوہ مُہرِ نبوت نوں چم کے
کہن لگا مُڑ دھون ادبوں جُھکا کے
محمد دے قدماں تے اکھیاں لگا کے
مرے آقا لگا تے سی تازیانہ
میں اُنج بخش دیتا سی شاہ زمانہ
ایہہ جو وی اے ہن میرے سُلطان کیتا
ہے دوزخ توں بچنے دا سامان کیتا
میں کی ورنہ سرکار بدلہ سی لیناں
میں کیوں جان بجھ کے سی دوزخ چہ پیناں
عکاشہ دا سر اپنے قدماں توں چا کے
کہیا میرے محبوب نے مسکرا کے
عکاشہ تیرے تے جہنم حرام ایں
تے صائم دا سوہنے نوں لکھ لکھ سلام ایں
شاعر کا نام :- علامہ صائم چشتی
کتاب کا نام :- کلیات صائم چشتی