خاتم الانبیاء سید المرسلیںؐ تجھؐ سا کوئی نہیں

خاتم الانبیاء سید المرسلیںؐ تجھؐ سا کوئی نہیں

یعنی کونین میں تُوؐ ہے سب سے حسیں ، تجھؐ سا کوئی نہیں

---

اے شفیعِ اُممؐ ، مجھ پہ کرنا کرم ، میرا رکھنا بھرم

میں خطا کار،تُوؐ شافع المذنبیںؐ ، تجھؐ سا کوئی نہیں

---

اے شہِ ؐ بحر و بر ، شب کے پچھلے پہر اور شام و سحر

بہرِ اُمت ہوا قلب تیراؐ حزیں تجھؐ سا کوئی نہیں

---

شاہِ ابرار تُوؐ ، سب کا دلدار تُوؐ ، سب کو درکار تُو

جانِ ہر دوجہاںؐ ،رُوحِ دُنیا و دیںؐ ، تجھؐ سا کوئی نہیں

---

یا نبیؐ مصطفیٰ ، تُوؐ ہے سب سے جدا ، تیراؐ رتبہ بڑا

آسمان و زمیں ، تیرےؐ زیرِ نگیں ، تجھؐ سا کوئی نہیں

---

تیرےؐ گھر بار میں ، تیرےؐ دربار میں ، تیریؐ سرکار میں

تیراؐ دربان ہے ، جبرائیلِ امیںؑ ، تجھؐ سا کوئی نہیں

---

اے وریٰ سے وریٰ ، اک جھلک باخدا، مجھ کو کر دو عطا

چہرئہ و الضحیٰ ، نورِعرشِ بریں ، تجھؐ سا کوئی نہیں

---

مجھ گناہ گار کو ، مجھ خطا کار کو، مجھ سیاہ کار کو

رکھنا اشفاقؔ کو ، روزِ محشر قریں ، تجھؐ سا کوئی نہیں