کتنا حسین دلکش اعلیٰ ترا خیال

کتنا حسین دلکش اعلیٰ ترا خیال

شاخِ ثنا پہ آج بھی اُترا ترا خیال

---

غم راحتوں میں ڈھل گئے دل جگمگا اٹھا

جب بھی تصورّات میں چمکا ترا خیال

---

چکرا گیا ہے عشق بھی آفاق دم بخود

یوں ساکنانِ طیبہ نے رکھا ترا خیال

---

جب بھی سنا ہے شہرِ مدینہ کا تذکرہ

اِک وجد آیا روح کو چھایا ترا خیال

---

فرمایا رب نے رات کا کچھ کم کرو قیام

ہے ربِ ذوالجلال کو کتنا ترا خیال

---

تیرے کرم سے سوچ کا قبلہ بدل گیا

پیشِ نظر ہے اب مرے آقاؐ ترا خیال

---

رب کی عطا سے مل گیا انساں تجھے شعور

ـذکرِ حبیبِ پاک سے نکھرا ترا خیال

---

مدحت نگار کہہ گئے ہر دور میں شکیلؔ

ذہنوں کی دسترس سے ہے بالا ترا خیال