کتنے خوش بخت غم کے مارے ہیں
جو کسی کے نہیں تمہارے ہیں
اُس توقع کی آبرو رکھنا
جس توقع پہ دن گزار ے ہیں
ناز رب کو تمہاری خِلقت پر
ہم کو یہ ناز ہم تمہارے ہیں
جو غمِ عشقِ مصطفٰؐے میں بہیں
وہ تو آنسو نہیں ستارے ہیں
تم نگہبان ہو بحمدِ اللہ
جتنے طوفاں ہیں سب کنارے ہیں
عاصیوں کا نصیب کیا کہنا
یہ حبیبؐ ِ خدا کو پیارے ہیں
سارے جلوے رسولؐ کے خالدؔ
حُسن ِ مطلق کے استعارے ہیں
شاعر کا نام :- خالد محمود خالد
کتاب کا نام :- قدم قدم سجدے