کیا بات مری سرکاراں دی
محبوب مٹھل من ٹھاراں دی
بھلیاں توں چار ستے پایا
ویریاں تائیں یار بنایا
گل کر کے خلق پیاراں دی
کیا بات مری سرکاراں دی
بیٹھ گیا جتھے دو گھڑیاں
اوس جگہ نوں رنگناں چڑھیاں
پئی آوے مہک بہاراں دی
کیا بات مری سرکاراں دی
خلق خلوص نبی سرور دا
ماڑیاں دے ہتھ سر تے دھر دا
پکھ کردا اوگنہاراں دی
کیا بات مری سرکاراں دی
موہڈے تے رکھ کمبل کالا
اوتھے اوندا کملی والا
جتھے محفل سجدی یاراں دی
کیا بات مری سرکاراں دی
دتا سوہنے سوہنا مرشد
پیارا تے من موہناں مرشد
گل بن گئی اے لاچاراں دی
کیا بات مری سرکاراں دی
کی منگناں میں ہور نیازی
سوہنا رہے میرے تے راضی
میں نوکر ہاں دلداراں دی
کیا بات میری سرکاراں دی
شاعر کا نام :- عبدالستار نیازی
کتاب کا نام :- کلیات نیازی