لفظ پھولوں کی طرح مہکے ہوئے ہیں آج بھی

لفظ پھولوں کی طرح مہکے ہوئے ہیں آج بھی

آپؐ سے گُل پاش لَب لَو دے رہے ہیں آج بھی

---

کل نہ تھی صرف آپؐ کے قدموں کی دنیا کو تلاش

جانے کتنے لوگ راہوں میں پڑے ہیں آج بھی

---

گفتگو کرتے تھے کل بھی رہ روانِ شوق سے

آپؐ کی گلیوں کے پتھر بولتے ہیں آ ج بھی

---

کل بھی آتے تھے غلاموں کی طرح دربار میں

باادب چاروں طرف قُدسی کھڑے ہیں آج بھی

---

آپؐ کی نگری میں کل بھی تھا سماں اِک نُور کا

چار جانب عرش کے منظر سجے ہیں آج بھی

---

چُومتے تھے کل بھی آکر آپؐ کے قدموں کی دُھول

آسماں کتنی عقیدت سے جُھکے ہیں آج بھی

---

آپؐ کی نعتیں پڑھا کرتے تھے کل بھی نعت خواں

شہد کانوں میں سراسر گھولتے ہیں آج بھی