میں چُپ تھا ہو رہی تھی مرے ترجماں کی بات

میں چُپ تھا ہو رہی تھی مرے ترجماں کی بات

پیشِ مُواجہہ مرے اشکِ رواں کی بات

---

پھوٹی نہالِ فکر سے کونپل درود کی

امڈی ہے چشمِ تر میں دلِ بے زباں کی بات

---

ہو ذکر کچھ تو شہ گلِ گلزارِ قدس کا

اے عندلیب، جانِ گلستانِ جاں کی بات

---

گوشہ نشینِ غارِ حرا کا ہو تذکرہ

یا زیب و زینتِ چمنِ لامَکاں کی بات

---

اس بوریا نشین کی مدحت محال ہے

ممکن نہیں ہے عرش کے اس میہماں کی بات

---

فردوس کی طلب ہے نہ دوزخ کا خوف ہے

پڑھیے درود چھوڑیے سود و زیاں کی بات

---

رہتا ہے تیز دھوپ سے میرا مکالمہ

ہوتی ہے روز تیرے خنک سائباں کی بات

---

ہے آبرو سخن کی ثنائے رسول سے

ہے سیّد الکلام شہِ کن فکاں کی بات