ممنون ہیں سب انسان ترے
کملی والے قربان ترے
پھرتا تھا ازل کی گلیوں میں
موجود و عدم دالان ترے
خاموشی بھی الہام بکف
احکام خدا فرمان ترے
صورت بھی حسیں سیرت بھی حسیں
نفسِ مضموں عنوان ترے
جو قتل تجھے کرنے آئے
لے کر نکلے گلدان ترے
میں تیرا عاشق کہلایا
جھومر میرا احسان ترے
رحلِ دل پر قرآں کی طرح
ظاہر باطن جُزدان ترے
چاند اور سورج شمعیں تیری
بھوک اور فاقے پکوان ترے
تُو خالی بھی تھا بھرا ہوا
دشمن بھی ہوئے مہمان ترے
کیوں فقر پہ فخر نہ تو کرتا
تاجوں والے دربان ترے
سُن نعت مظفر جیسوں سے
کہلائیں یہ خوش اِلحان ترے
شاعر کا نام :- مظفر وارثی
کتاب کا نام :- امی لقبی