معراجِ نبیؐ آج ہے افلاک سجے ہیں
مہمانِ خدا عرش پہ سرکار بنے ہیں
خورشید و فلک، انجم و مہتاب و ثریّا
سب بہرِ ادب راہِ پیمبر میں جھکے ہیں
اک عالمِ حیرت میں ملائک شبِ اِسری
لمحات میں صدیوں کا سفر دیکھ رہے ہیں
حاصل ہے انھیں منزلِ معراجِ محبت
جو سرورِ عالم کی غلامی سے جُڑے ہیں
آقاؐ کو شرف قربِ الٰہی کا ملا ہے
اسرارِ خدائی کے نئے باب کھُلے ہیں
قدسیِ فلک جن کی سمجھ پائے نہ رفعت
حد ان کی خرد والے بشر ناپ رہے ہیں
اقصیٰ میں نبی اور رُسُل سب ہیں مصلی
سرکار امامت کے مصلے پہ کھڑے ہیں
کس درجہ وہ خوش بخت زمانے میں ہیں احسؔن
جو رحمتِ کونین کا در دیکھ رہے ہیں
شاعر کا نام :- احسن اعظمی
کتاب کا نام :- بہارِ عقیدت