نظامِ بادہ نوشی مرضیٔ پیرِ مغاں تک ہے

نظامِ بادہ نوشی مرضیٔ پیرِ مغاں تک ہے

نگاہِ یار کی منزل خدا جانے کہاں تک ہے

---

کسی بھی غم کی اُلجھن ہو یا دل کی بے قراری ہو

ہماری دوڑ تو بس اک ترے ہی آستاں تک ہے

---

غبارِ راہِ جاناں پر فدا اہلِ جنوں ہونگے

خرد کا منتہیٰ تو منزل نام و نشاں تک ہے

---

کرم ان کا کہ ہوں میں مجلسِ حسانؓ میں شامل

رسائی میری نسبت کی نبیؐ کے مدح خوانوں تک ہے

---

پھر اس کے بعد محفل میں رہے گا دورِ خاموشی

یہ ہاؤ ہُو تو یارو اختتامِ داستاں تک ہے

---

ترے دردِ محبت کو ظہوریؔ کون سمجھے گا

یہاں اظہار کی صورت فقط طرزِ فغاں تک ہے