نورِ عرفاں نازشِ پیغمبری اُمّی نبیؐ

نورِ عرفاں نازشِ پیغمبری اُمّی نبیؐ

سر بسر دیوانِ علم و آگہی اُمّی نبیؐ

---

علم کے سورج بھی محتاجِ ضیا ہیں آپ کے

عقلِ کل بھی ہے سوالی آپ کی اُمّی نبیؐ

---

آپ کے تلوئوں کا دھوون ہر بصیرت کا جمال

آپ ہی کے دم قدم سے روشنی اُمّی نبیؐ

---

کھل گئے فکر و نظر میں سینہِ فطرت کے راز

مٹ گئی سارے جہاں سے تیرگی اُمّی نبیؐ

---

انشراح و ارتقا کے سر پہ بھی رکھیں قدم

ان کو بھی تو چاہیے نا رہبری اُمّی نبیؐ

---

رفعتِ افکار پر ہر برتری کے تاج پر

ہے ترے منشور کی جلوہ گری اُمّی نبیؐ

---

ہے کسے ادراکِ عظمت کون ہمسر ہے یہاں

زیرِ پائے ناز ہر اِک سروری اُمّی نبیؐ

---

بس یہی نعرہ لبِ دانشوری پہ ہے شکیلؔ

سیّدی و مرشدی اُمّی نبی اُمّی نبیؐ