پہنچا ہوں روبروئے حرم صاحبِ حرم
فرمایئے نگاہِ کرم صاحبِ حرم
ہر دم تو جہات کا طالب دلِ نزار
محتاجِ لطف دیدہ نم صاحبِ حرم
سامانِ اشک و آہ میسیّر ہو ہر گھڑی
کیف و سرور یوں ہو بہم صاحبِ حرم
خلقِ خد ا ہے نت نئے آشوب سے دو چار
رحمت مآب ، میرِ امم، صاحبِ حرم
امت حضورؐ کی ہے عجب ابتلاؤں میں
پہیم ہے اس پہ یورشِ غم صاحبِ حرم
دستِ دعا اٹھایئے ملّت کے واسطے
ٹوٹے حصارِ کرب و الم صاحبِ حرم
تائبؔ ہوا ہے طالبِ رحمت جناب سے
ہو اب تو سدِّ بابِ ستم صاحبِ حرم
شاعر کا نام :- حفیظ تائب
کتاب کا نام :- کلیاتِ حفیظ تائب