رحمتوں کا پُر تجلی ہے سماں چاروں طرف
مہرِ حق چمکا ہوا روشن جہاں چاروں طرف
عید میلاد النبیؐ کی ساعتِ پر نور ہے
ہیں غلامانِ رسالت شادماں چاروں طرف
جو بھی ذرے آگئے سرکار کے زیرِ قدم
ہوگئے روشن وہ مثلِ کہکشاں چاروں طرف
داعیِ اسلام کے فیضانِ دعوت کے طفیل
گامزن ہیں اہلِ حق کے کارواں چاروں طرف
نعرۂ وحدت کی جب فاران سے گونجی صدا
ہو گئے اصنامِ باطل بے نشاں چاروں طرف
آپ کی آمد کے صدقے آگئی فصلِ بہار
نور و نکہت کا چمن میں ہے سماں چاروں طرف
شانِ آقاؐ کیا گھٹائیں گے منافق دہر کے
جاں نثارانِ پیمبر ہیں یہاں چاروں طرف
آئیں گے اس دم شفاعت کا لیے مژدہ نبیؐ
ہوگا جب محشر میں شورِ الاماں چاروں طرف
تو ہی احسن مدحِ سرور میں نہیں رطب اللساں
تیرے جیسے ہیں ہزاروں مدح خواں چاروں طرف
شاعر کا نام :- احسن اعظمی
کتاب کا نام :- بہارِ عقیدت