ساڈے آقا کملی والے دی گفتار دے چرچے گلی و گلی
جیہدے نام نوں لگدیاں دو میماں اس یار دے چرچے گلی وگلی
اوہدا شان گھٹایاں نہیں گھٹنا لکھ زور کوئی لاوے نہیں چلناں
محشر تک ہندے رہنے نے سرکار دے چرچے گلی وگلی
سرکار نے اپنے ویریاں لئی چدراں وی آپ وچھایاں نے
دشمن وی کردے رہندے نے اوہدے پیارے دے چرچے گلی وگلی
اپنے کی غیراں لئی کھولے سرکار نے بوہے رحمت دے
اغیار وی کر دے امت دے غمخوار دے چرچے گلی وگلی
عرشی وی کردے رہندے نے فرشی وی کردے رہندے نے
میرے آقا کملی والے دے دربار دے چرچے گلی وگلی
اوہ رحمت کل جہاناں دی نہیں اوڑک اوہدیاں شاناں دی
دو جگ دے اندر نبیاں دے سردار دے چرچے گلی و گلی
ہو وے خیر غریب نوازی دی تے خبر غریب نیازی دی
ہن تے ہو گئے آقا تیرے بیمار دے چرچے گلی و گلی
شاعر کا نام :- عبدالستار نیازی
کتاب کا نام :- کلیات نیازی