سدا لج پال سوہنے تاجور دی خیر منگناں ہاں
میں ہر ویلے سخی دے سوہنے در دی خیر منگناں ہاں
میرے مرشد دے گھر نوں ہور وی رب بھاگ لا دیوے
ہاں منگتا اوس گھر دا اوس گھر دی خیر منگناں ہاں
جنہاں راہاں توں لنگھی اے میرے مرشد دی سواری
خدا کولوں سدا اس راہ گزر دی خیر منگناں ہاں
میرے مرشد دیاں خبراں جو دیوے آن کے مینوں
میں اپنے یار دے اس نامہ بر دی خیر منگناں ہاں
رہوے نظر کرم ہندی جو ہر ویلے غلاماں تے
میں لجپالاں دی اس سوہنی نظر دی خیر منگناں ہاں
خیال یار نئیں چھڈدا مینوں کلیاں کسے ویلے
میں اس ہمدرد سوہنے ہم سفر دی خیر منگناں ہاں
بڑے اوکھے نے پینڈے عشق دے ٹھیڈا نہ کھا جاواں
نیازی میں حیاتی دے سفر دی خیر منگناں ہاں
شاعر کا نام :- عبدالستار نیازی
کتاب کا نام :- کلیات نیازی