سارے جگ توں نرالیاں دسدیاں نے عربی سرکار دیاں گلیاں
کوہِ طُور تائیں شرمندہ کرن خالق دے یار دیاں گلیاں
اوہدے جلوے خاک نوں نور کرن ذرّے ذرّے نوں بھرپُور کرن
بھلا جنّت کد منظور کرن جنّھاں ڈِٹھیاں یار دیاں گلیاں
پُچھ جبرائیل امین کولوں پُچھ مالِکِ یَومِ الدِّیْن کولوں
چنگیاں نے عرش بریں کولوں مَدنی دلدار دیاں گلیاں
میری آس پُکارے یا مولا سُتّے لیکھ جگاوے یا مولا
اک وار دکھا دے یا مَولا سوہنی سرکار دیاں گلیاں
اعظؔم کیہہ سانوں دَسنا ئیں ، کیوں دل پیا ساڈا کھسنا ئیں
سانوں کیہڑا کعبہ دسنا ئیں ساڈا کعبہ یار دیاں گلیاں
شاعر کا نام :- محمد اعظم چشتی
کتاب کا نام :- کلیاتِ اعظم چشتی