شافعِ روزِ محشر پہ لاکھوں سلام
ساقیِ حوضِ کوثر پہ لاکھوں سلام
قاسمِ نعمت و مالکِ جز و کل
دونوں عالم کے سرور پہ لاکھوں سلام
عرش سے آگے جن کی رسائی ہوئی
یعنی محبوبِ داور پہ لاکھوں سلام
زلف و رخسار کی کھائے قرآں قسم
مصطفیٰ نوری پیکر پہ لاکھوں سلام
ان کے روضے کی حرمت پہ بے حد درود
ان کی محراب و منبر پہ لاکھوں سلام
حشر میں امتی امتی کی صدا
اس شفاعت کے تیور پہ لاکھوں سلام
جس کے صدقے میں جنت کا مژدہ ملے
سجدہء یومِ محشر پہ لاکھوں سلام
نازِ صدق و صفا، فخرِ جود و سخا
یعنی صدیقِ اکبر پہ لاکھوں سلام
حضرت عثماں کی شرم و حیا پر درود
ابنِ خطاب و حیدر پہ لاکھوں سلام
جن کے بیٹے امام اور شوہر امام
سرورِ دیں کی دختر پہ لاکھوں سلام
فخرِ آلِ پیمبر کہیں ہم جنہیں
یعنی شبیر و شبر پہ لاکھوں سلام
مظہرِ شانِ قدرت ہیں غوث الوریٰ
معرفت کے سمندر پہ لاکھوں سلام
خواجہء خواجگاں، دینِ حق کے معیں
استقامت کے جوہر پہ لاکھوں سلام
شاہِ برکت کی برکت پہ بے حد درود
بحرِ عرفاں کے گوہر پہ لاکھوں سلام
ہم کو سکھلائی اچھے برے کی تمیز
اعلیٰ حضرت سے رہبر پہ لاکھوں سلام
عاشقِ مصطفیٰ جبرئیلِ امیں
ان کے نورانی شہپر پہ لاکھوں سلام
عشقِ احمد میں نظمی جو سرشار ہو
اس کے اونچے مقدر پہ لاکھوں سلام
شاعر کا نام :- سید آل رسول حسنین میاں برکاتی نظمی
کتاب کا نام :- بعد از خدا