شان اُچا اے عرش معلی توں وی
کملی والے محمد دے دربار دا
ہین منگتے سکندر جئے اوس دے
جو گدا ہے مدینے دے سردار دا
چھڈ کے رضوان جنت دی گلزار نوں
آوندے چمن محمد دے دربار نوں
اوہدے دربار توں ہوواں قُربان میں
مُل پیندا جتھے ہر گنہگار دا
میرے آقا دی شاہی اے دارین تے
جاری سکہ اے سوہنے دا کونین نے
چن سُورج ستارے زمین آسماں
حکم من دے نے ہر وقت سرکار دا
اینویں پیچے نہ عقلی لڑا دوستا
کیویں سمجھیں گا معراج دا فلسفہ
اک قدم فرش تے عرش تے دُوسرا
لیکھا کر تے سہی اوہدی رفتار دا
تاجور سوہنا سارے حسیناں دا اے
دولہا عالم دے سب مہ جبیناں دا اے
حسن یوسف نوں لبھدی زُلیخا رہی
بُھکھا یوسف اے سوہنے دے دیدار دا
شان دساں کی ہے پایا جو بوبکر
سوہنا سی جسدی آغوش وچ جلوه گر
یار دی دید کردی نہ تھکی نظر
مار تھکیا کسی ڈنگ مار دا مار دا
اوہدے در توں ناں کوئی وی خالی گیا
جھولیاں بھر کے ہر اک سوالی گیا
کھلا رہندا اے صائم خزانہ سدا
دو جہاناں دے مالک تے مختار دا
شاعر کا نام :- علامہ صائم چشتی
کتاب کا نام :- کلیات صائم چشتی