تلاشِ تابشِ انوار ہے کہیں تو فضول

تلاشِ تابشِ انوار ہے کہیں تو فضول

نجوم و کہکشاں سب کیا ہیں گردِ پائے رسول

---

اُنہی کی یاد اُنہی کا خیال اُن پہ درود

یہی عمل ہو مِرا روز و شب یہی معمول

---

انہی کی یاد میں گزرے تو کار آمد ہے

نہیں تو موت بھی بے سود زندگی بھی فضول

---

ہے وردِ سورتِ والیل و والضحیٰ جب سے

نظر میں رہتا ہے عکسِ جمالِ پاکِ رسول

---

غمِ حبیبِ خدا دل کو شادماں رکھے

مجھے نہ یورشِ آلام کر سکے گی ملول

---

لگائیں آنکھوں میں اپنی تو قلب روشن ہو

کہ کیمیائے سعادت ہے اُن کے پاؤں کی دھول

---

خدا تک اور کوئی راستہ نہیں جاتا

خدا کے دوست اگر ہیں تو عاشقانِ رسول

---

شفیقؔ کاش وہی ایک شعر تو لکھتا

جو بارگاہِ رسالت مآب میں ہو قبول