وُہ ہادیِ جہاں جسے کہیے جہانِ خیر
نسبت سے اس کی میرا وطن ہے نشانِ خیر
وُہ تابِ جاں ، سحابِ کرم، انتخاب ِ حق
وہ شانِ فقر، آنِ تمّدن ، روانِ خیر
اس کا پیامِ انس و مواخات ، روحِ دیں
اُس کا نظام ِ عدل و مساوات ، جانِ خیر
وُہ بارگاہِ ناز سے لوٹا بصد نیاز
لے کر برائے نوعِ بشر ارمغانِ خیر
کتنی عظیم بیعتِ رضواں کی شان ہے
فتحِ مبیں کے ساتھ چلا کاروانِ خیر
آلِ نبیؐ سفینہ بحرِ حیات ہے
اصحاب ہیں نجوم سرِ آسمانِ خیر
یارب ! جہاں میں دستِ خزاں ہے دراز تر
محفوظ اس کے شر سے رہے گلستانِ خیر
فِتنوں کی تیز دھوپ میں قائم رہیں جو اس
خیر الامم کے سر پہ رہے سائبانِ خیر
تائب نگاہِ رحمتِ عالم سے بن گیا
ہر مصرعِ ثنائے نبیؐ ترجمانِ خیر
شاعر کا نام :- حفیظ تائب
کتاب کا نام :- کلیاتِ حفیظ تائب