یاد وچہ روندیاں نیں اکھیاں نمانیاں
سد لو مدینے آقا کرو مہربانیاں
ساری کائنات دا خزینہ مل گیا اے
اللہ دی سونہہ جنہاں نوں مدینہ مل گیا اے
جالیاں دے کول بہہ کے اونہاں موجاں بانیاں
سد لو مدینے آقا کروں مہربانیاں
سارے جگ نالوں اوہ فضاواں ای نرالیاں
دسدیاں جدوں سوہنے روضے دیاں جالیاں
شالا کدے پھیر آون رُتاں اوہ سہانیاں
سد لو مدینے آقا کروں مہربانیاں
در دے سوالیاں دی جھولی خیر پاؤ ناں
عاجزاں غریباں تائیں سینے نال لاؤ ناں
ایخو لج پالاں دیا عادتاں پُرانیاں
سد لو مدینے آقا کروں مہربانیاں
غیراں اگے کدی دُکھ اپنا نہ پھول دے
چُپ چُپ رہندے مونہوں اُچّا وی نہ بول دے
آقا دے غلاماں دیاں ایخو نیں نشانیاں
سد لو مدینے آقا کروں مہربانیاں
ساڈا تے ظہوریؔ ایخو دین تے ایمان ایں
پیار کملی والے دا عبادتاں دی جان ایں
پیار بناں سبھے گلاں قصے تے کہانیاں
سد لو مدینے آقا کروں مہربانیاں
شاعر کا نام :- محمد علی ظہوری
کتاب کا نام :- کِتھے تیری ثناء