زمیناں، آسماناں ساریاں خوشیاں منائیاں نے
مرے سرکارؐ آئے، رحمتاں وی نال آئیاں نے
بڑی امید اے، سرکارؐ ایتھے پان گے پھیرا
اساں ایسے لئی بازار تے گلیاں سجائیاں نے
جدوں ملیا تے روشن ہوگئی گدڑی حلیمہؓ دی
اوہ جیہڑا لعل سوہنا مکے وچ چھڈیا سی دائیاں نے
ایہ سورج، چن، تارے، بدلاں اوہلے ہوگئے سارے
مرے سرکارؐ نے چہرے توں جد زلفاں ہٹائیاں نے
مدثر تے مزمل، والضحیٰ، یٰسین تے کوثر
ایہ سبھے سورتاں رب اوہدیاں نعتاں بنائیاں نے
ایہ موتی عاشقاں دی اکھیاں وچ سج گئے جیہڑے
ہواواں ٹھنڈیاں سرکارؐ دے شہروں لیائیاں نے
اکھاں وچ ہار ہنجواں دے لباں تے نام سوہنے دا
ظہوریؔ بس اساڈے کول تے ایخو کمائیاں نے
شاعر کا نام :- محمد علی ظہوری
کتاب کا نام :- صفتاں سوہنے دیاں