مجھے نہ مژدہء کیفیتِ دوامی دے

مجھے نہ مژدہء کیفیتِ دوامی دے

مرے خدا ! مجھے اعزازِ ناتمامی دے

---

میں تیرے چشمہء رحمت سے شاد کام تو ہوں

کبھی کبھی مجھے احساسِ تشنہ کامی دے

---

مجھے کسی بھی معزز کا ہم رکاب نہ کر

میں خود کماؤں جسے ‘ بس وہ نیک نامی دے

---

وہ لوگ جو کئی صدیوں سے ہیں نشیب نشیں

بلند ہوں ‘ تو مجھے بھی بلند بامی دے

---

تری زمین پہ تیرے چمن رہیں آباد

جو دشتِ دِل ہے ‘ اُسے بھی تو لالہ خامی دے

---

بڑا سُرور سہی تجھ سے ہمکلامی میں

بس ایک بار مگر ذوقِ خود کلامی دے

---

میں دوستوں کی طرح خاک اُڑا نہیں سکتا

میں گردِ راہ سہی ‘ مجھ کو نرم گامی دے

---

عدوئے نم ہوں ‘ تو کر آندھیوں کی نذر ‘ مگر

رفیق گلِ ہوں ‘ تو مجھ کو صبا خرامی دے

---

اگر گِروں تو کچھ اس طرح سَر بلند گروں

کہ مار کر ‘ مرا دشمن مجھے سلامی دے