یہ دل کہہ رہا ہے کہ آتا ہے کوئی

یہ دل کہہ رہا ہے کہ آتا ہے کوئی

مدینے سے پیغام لاتا ہے کوئی

---

زباں سے نکلتے ہی نامِ مُحمَّد

نظر میں مری آ، سماتا ہے کوئی

---

مدینے کی گلیوں میں ہر ہر قدم پر

جبینِ مُحبَّت جُھکاتا ہے کوئی

---

کہے جا صبا ہاں مُحمَّد مُحمَّد

کہ اس نام سے چین پاتا ہے کوئی

---

مری آنکھ میں آہی جاتے ہیں آنسو

مدینے کی جانب جو جاتا ہے کوئی

---

مدینے کو میں یہ خُدا جانتا ہے

نہیں جا رہا ہوں بُلاتا ہے کوئی

---

کوئی جانِ طیبہ سے بہزؔاد کہہ دے

بہت ہجر کا غم اُٹھاتا ہے کوئی