اہلِ ایماں کے لیے جانوں سے اولیٰ آپؐ ہیں

اہلِ ایماں کے لیے جانوں سے اولیٰ آپؐ ہیں

جوں کے سب رشتوں سے ارفع اور اعلیٰ آپؐ ہیں

---

کوئی مومن ہی نہیں ان کی محبت کے بغیر

ہر دلِ تیرہ میں ایماں کا اجالا آپؐ ہیں

---

حق نے ٹھہرائی محبت آپ کی ایماں کی شرط

ٹھہرا احسن اور اجمل جن کا اسوہ آپؐ ہیں

---

حُبِّ سرورؐ کا تقاضا پیروی ہے آپؐ کی

خوش خدا ہوتا ہے جس سے وہ حوالہ آپؐ ہیں

---

حق تعالیٰ کی اطاعت ہے اطاعت آپؐ کی

گویا عرفانِ الٰہی کا وسیلہ آپؐ ہیں

---

آپ ہی کے واسطے تخلیق کا سارا عمل

زیست کے پیچھے جو ٹھہرے کار فرما آپؐ ہیں

---

جس سے خوش حاصل ہوئی ہے سر زمینِ زندگی

وہ تلّطف آشنا رحمت کا دریا آپؐ ہیں

---

عدل و احساں کا نظامِ جانفزا جس نے دیا

وہ محبت آفریں ، رحمت سراپا آپؐ ہیں

---

حرفِ آخر جانیے تائبؔ یہ ارشادِ خدا

اہلِ ایماں کے لیے جانوں سے اولیٰ آپؐ ہیں