بچھا ہے ہر طرف خوانِ محمّد ﷺ
جہاں سارا ہے مہمانِ محمّد ﷺ
مُحافِظ جب ہے رحمانِ محمّد ﷺ
مُحرَّف کیوں ہو قرآنِ محمّد ﷺ
مرادوں کی ابھی کھل جائیں گرہیں
مدد کر ! زلفِ پیچانِ محمّد ! ﷺ
طریقت کیا ہے؟ حالِ مصطفائی
شریعت کیا ہے ؟ فرمانِ محمّد ﷺ
ہے جن سے رات دن کو فیض حاصل
وہ زلف و رُوئے تابانِ محمّد ﷺ
اٹھے گا نعت پڑھتا ان شاء اللہ
یہاں جو ہے ثنا خوانِ محمّد ﷺ
ملائک در قیامت می تلاشند
مَنَم مَخفِیِّ دامانِ محمّد ﷺ
نگہ کردم نہ سوئے حسنِ دنیا
معظّم ! مَن ،کہ مستانِ محمّد ﷺ
کجا قطرہ کجا دریا معظمؔ!
کجا تو اور کجا شانِ محمّد ﷺ
شاعر کا نام :- معظم سدا معظم مدنی
کتاب کا نام :- سجودِ قلم