ہم کو کیا مل گیا ہے چاندنی سے ‘ ہم کو کیا دے دیا روشنی نے

ہم کو کیا مل گیا ہے چاندنی سے ‘ ہم کو کیا دے دیا روشنی نے

اپنے یہ چاند سورج سنبھالو ‘ ہم تو جاتے ہیں اپنے مدینے

---

میں کسی در پہ سر کیوں جھکا دوں ‘ خالی دامن تمہیں کیوں دکھادوں

میرے آقاﷺ کی نگری سلامت ‘ جس کی گلیوں میں گھر گھر خزینے

---

ضبط کا مجھ میں یارا نہیں ہے ‘ رنجِ دُوری گوارا نہیں ہے

ذکرِ طیبہ خدارا نہ چھیڑو ‘ پھر چھلک جائیں گے آبگینے

---

شرم سے سر جھکے جارہے ہیں ‘ دل میں رہ رہ کے پچھتا رہے ہیں

اللہ اللہ یہ بارانِ رحمت ‘ آگئے عاصیوں کو پسینے

---

علم و عرفان کا میں کیا کروں گا ‘ درسِ ایماں کسی سے نہ لوں گا

میرے آقاﷺ کے قدموں کے نیچے ہیں فضائل لاکھوں دفینے

---

وہ معطر معطر ہوائیں ‘ وہ منور منور فضائیں

جن کی خوشبو سے معمور سا نسیں ‘ جن کے جلووں سے پُر نور سینے

---

آدمی کا بھرم کھو گیا تھا ‘ غرقِ سیلابِ غم ہو گیا تھا

لیکن اک نا خدا کے سہارے ‘ پھر ابھر آئے ڈوبے سفینے

---

عمر اقبؔال یو نہی بسر ہو ‘ ہر نفس یاد خیر البشرﷺ ہو

صبح تا شام ذکرِ مسلسل ‘ اور راتوں کو پیہم شبینے