جنت کی نعمتوں سے میں منکر نہیں مگر

جنت کی نعمتوں سے میں منکر نہیں مگر

شہرِ نبی ؐ کی آب و ہوا ہی کچھ اور ہے

---

کعبے کی رونقوں کا تو کہنا ہی کیا مگر

ایوانِ مصطفیٰ ؐ کی فضا ہی کچھ اور ہے

---

عشقِ رسول ﷺ کیا ہے مسیحا کو کیا خبر

اس دردِ جانفزا کی دوا ہی کچھ اور ہے

---

شاہی سے بے نیاز فقیری میں سرفراز

اس در کے سائلوں کی ادا ہی کچھ اور ہے

---

اس در پہ بھیک ملتی ہے بے حد و بے طلب

سرکار کا مزاجِ عطا ہی کچھ اور ہے

---

قدموں سے ان کے بڑھ کے لپٹ جاؤ عاصیو

آقا کی شان عفوِ عطا ہی کچھ اور ہے

---

بے لوث بندگی کا بڑا اجر ہے مگر

تقلیدِ مصطفیٰ ؐ کا صلہ ہی کچھ اور ہے

---

لطفِ غزل بھی خوب ہے اپنی جگہ مگر

نعتِ نبی کا سچ ہے مزہ ہی کچھ اور ہے

---

دنیا خد ا سے مانگتی ہے مال و زر مگر

اقبؔال کے لبوں پر دعا ہی کچھ اور ہے