کبھی ان کی خدمت میں جا کے تو دیکھو

کبھی ان کی خدمت میں جا کے تو دیکھو

درِ مصطفیٰﷺ کھٹکھٹا کے تو دیکھو

---

جوابِ صدا تم کو فوراً ملے گا

انہیں صدق دل سے بلا کے تو دیکھو

---

وہ چاہیں تو لمحوں میں بگڑی بنا دیں

ادب سے انہیں کچھ بتا کے تو دیکھو

---

دعا خالی لوٹے یہ ممکن نہیں ہے

دعا کے لیے ہاتھ اٹھا کے تو دیکھو

---

وہ ہیں غم نصیبوں کا واحد سہارا

انہیں اپنا دُکھڑا سنا کے تو دیکھو

---

وہ آنسو کسی کے نہیں دیکھ سکتے

ندامت سے آنسو بہا کے تو دیکھو

---

چھپا لیں گے کملی میں تم کو وہ اپنی

انہیں فردِ عصیاں دکھا کے تو دیکھو

---

تڑپ کر لپٹ جاؤ قدموں سے ان کے

میرا مشورہ آزما کے تو دیکھو

---

اندھیرا بہت دور بھاگے گا تم سے

چراغِ عقیدت جلا کے تو دیکھو

---

نا معلوم اقباؔل کیا تم کو مل جائے

انہیں نعت اپنی سنا کے تو دیکھو