کِس نے پایا ہے جہاں کی رہنمائی کا شرف
کس کو بخشا ہے خدا نے مصطفائی کا شرف
ہستی ختمِ ؐ رُسل ہے زیب دیتا ہے جسے
کَشتی انسانیت کی نا خدائی کا شرف
آپ کی ذاتِ گرامی کے سوا کس کو ملا
سرورِؐ دیں کا لقب ، خیر الورائی کا شرف
پیشوائے انبیا ہیں ، صاحب ِ اسرا بھی ہیں
لا مکاں تک آپ کو حاصل رسائی کا شرف
اپنی خوش بختی پہ تائبؔ کیوں نہ مجھ کو ناز ہو
کم نہیں سرکارؐ کی مدحت سرائی کا شرف
شاعر کا نام :- حفیظ تائب
کتاب کا نام :- کلیاتِ حفیظ تائب