نورِ نگاہِ خَلق ہو، رنگِ رُخ حیات ہو
زینتِ عرش و فرش ہو، رونقِ شش جہات ہو
عدل کی صبحِ زرنگار ، خیر کا باغِ پُر بہار
عِلم کا شہر بے کنار، حُسن کی کائنات ہو
شاہِ گلیم پوش بھی ، رہبرِ عقل و ہوش بھی
مرسلِ حق نیوش بھی، مظہر نورِ ذات ہو
قائدِ مرسلیں تمھی، ہادی آخریں تمھی
رحمتِ عالمیں تمھی ، مصدرِ التفات ہو
اب تو سنو انیسِ جاں ! نالہَ شب گزیدگاں
صبح کا نور ہو عیاں ظلمتِ شب کو مات ہو
شاعر کا نام :- حفیظ تائب
کتاب کا نام :- کلیاتِ حفیظ تائب