اے شاہؐ ِ دیں ! نجات کا عنواں ہے تیری یاد
نورِ حیات، مایہ ایماں ہے تیری یاد
روشن ہے جس کی ضَو سے جہانِ دل و نظر
وہ شمعِ تابناک و فروزاں ہے تیری یاد
ہر سینہ فگار کی تسکیں ترا خیال
ہر جانِ دردمند کا درماں ہے تیری یاد
ہر حال میں نویدِ مسّرت ہے تیرا نام
ہرفصل میں بہار بدا ماں ہے تیری یاد
تائب کی لَے میں سوزِ نوائے حجاز ہے
سرمایہ نشاطِ فراواں ہے تیری یاد
شاعر کا نام :- حفیظ تائب
کتاب کا نام :- کلیاتِ حفیظ تائب