مجھ کو بھی کاش جلوہء خضرا دکھائی دے

مجھ کو بھی کاش جلوہء خضرا دکھائی دے

بے نور آنکھ سے بھی اُجالا دکھائی دے

---

تھوڑی سی دیر کو مجھے بینائی چاہیے

بس اک جھلک حضورﷺ کا روضہ دکھائی دے

---

یا رب عطا ہو مجھ کو وہ مخصوص روشنی

اٹھے جدھر نگاہ مدینہ دکھائی دے

---

جا گوں تو صرف ان کے خیالوں میں گم رہوں

سو جاؤں تو فقط رخِ آقاﷺ دکھائی دے

---

منزل مری وہ شہرِ کراما ت ہو جہا ں

ذرّوں سے آفتاب ابھرتا دکھائی دے

---

وہ شہر جس کا نام تو کعبہ نہیں مگر

گلیوں میں جس کی رونقِ کعبہ دکھائی دے

---

بے نوری نگاہ کا اک فائدہ بھی ہے

کانٹے سجھائی دیں نہ اندھیرا دکھائی دے

---

اقباؔل اپنی چشمِ بصیرت سے کام لو

یہ کیا ضرور آنکھ سے رستہ دکھائی دے