نہ خوابِ جنت و حُور و قصور دیکھا ہے

نہ خوابِ جنت و حُور و قصور دیکھا ہے

نہ ہم نے جلوہء طوبیٰ و طور دیکھا ہے

---

مگر یہ ناز ہے ہم کو کہ چشم باطن سے

ہزار بار مدینہ ضرور دیکھا ہے

---

وفورِ شوق میں ہم چل پڑے ہیں سوئے حرم

نہ پاس دیکھا ہے ہم نے نہ دُور دیکھا ہے

---

چراغِ طاقِ حرم ہے ‘ حریم کعبہ ہے

وہ آنکھ جس نے دیارِ حضور ﷺ دیکھا ہے

---

اذانِ صبح میں جب جب سنا ہے نام ِرسول ﷺ

زمیں سے تابہ فلک خطِ نور دیکھا ہے

---

خدا کی شان نظر آئی ہم کو قرآں میں

مگر کچھ اور بھی بین السطور دیکھا ہے

---

مدینے جا کے نہ پوچھو کہ ہم نے کیا دیکھا

بس ایک عالمِ صد رنگ و نُور دیکھا ہے

---

خلوصِ دل سے صدا دی ہے جب انہیں اقبؔال

نزولِ رحمت ِ ربِ غفور دیکھا ہے