سرورِ دین و شہنشاہ اُمم
ذاتِ پاک مصطفےٰ ﷺ جانِ حرم
صاحبِ لولاک و روحِ کن فکاں
نُور اوّل حاصلِ لوح و قلم
بر بنائے مصلحت اُمی لقب
لیکن آگاہِ رموزِ کیف و کم
چشمہء الطاف ہو جائے رواں
جس طرف اُٹھ جائے وہ چشمِ کرم
اللہ اللہ خواب گاہِ مصطفےٰ ﷺ
پُر وقار و پُر شکوہ و محتشم
لمحہ لمحہ اس فضا کا جانفزا
ذرّہ ذرّہ اُس زمیں کا محترم
مل گیا اقبؔال دامانِ رسول ﷺ
فکر عقبیٰ ہے نہ اب دُنیا کا غم
شاعر کا نام :- پروفیسراقبال عظیم
کتاب کا نام :- زبُورِ حرم