ہیں محمد ﷺ روحِ حیات
ان کا پیکر مظہرِ انوارِ ذات
اُن کے دم سے ہے رونقِ بزمِ حیات
اُن کی ممنونِ کرم کل کائنات
اُن سے پُر رونق تمامِ ہست و بود
اُن کے قدموں میں نظام ممکنات
اُن سے لرزاں کفر و باطل کا غرور
اُن کے آگے سرنگوں لات و منات
اُن کے سر پر ظلِ سبحانی کا تاج
اُ ن کے گرد و پیش جلووں کی برات
اُن کی صورت عکسِ قرآنِ مبیں
اُن کی سیرت وحیِ ربِ کائنات
اُن کی سانسیں نکہتِ باغِ جناں
اُن کی باتیں غیرت ِ قند و نبات
اللہ اللہ وہ سفر وہ منزلیں
ساری راتوں سے مقدس تر وہ رات
شاعر کا نام :- پروفیسراقبال عظیم
کتاب کا نام :- زبُورِ حرم