ملے ‘ جو مجھ سے کوئی برہمی سے ملتا ہے

ملے ‘ جو مجھ سے کوئی برہمی سے ملتا ہے

گدائے طیبہ تو مجھ سے خوشی سے ملتا ہے

---

میں اس امید پہ آنکھیں بُجھائے بیٹھا ہوں

کہ روشنی کا پتہ تیرگی سے ملتا ہے

---

شعور زیست کتابوں میں ڈھونڈنے والو

شعورِ زیست تو عشقِ نبی ﷺ سے ملتا ہے

---

جسے خلوصِ عقیدت کا نام دیتے ہو

وہ خود روی سے نہیں ‘ پیروی سے ملتا ہے

---

وہ جانتا ہے تقلیدِ مصطفیٰ ﷺ کیا ہے

جو دوستوں کی طرح اجنبی سے ملتا ہے

---

اس آدمی کے مراتب بشر کو کیا معلوم

خدا بھی عرش پہ جس آدمی سے ملتا ہے

---

نقوش پائے محمد ﷺ ہوں جس گلی کو نصیب

سراغِ عظمتِ آدم اِسی سے ملتا ہے

---

وہ راستہ جو پہنچتا ہے عرش و کرسی تک

براہِ کعبہ انہیں کی گلی سے ملتا ہے

---

غزل سرائی سے اقبال وہ کہاں حاصل

سرور و کیف جو ذکرِ نبی ﷺ سے ملتا ہے