نام لے کے ان کا رب سے مانگنا
ہے مسبب یا سبب سے مانگنا
تب سے ہے لبریز کاسہ آپؐ سے
کر دیا آغاز جب سے مانگنا
نعت کہنا سرورِؐ کونین کی
بڑھ کے ہے حسنِ طلب سے مانگنا
ہے سبب ربِ علا کے لطف کا
مصطفیٰؐ رحمت لقب سے مانگنا
خیر خواہی امّتِ مرحوم کی
سیکھیے شاہِؐ عرب سے مانگنا
اس کی قسمت میں ہوں حق کی رحمتیں
جس کو آتا ہے ادب سے مانگنا
ان کی جانب کر دیا دامانِ دل
جب نہ طاہرؔ آیا لب سے مانگنا
شاعر کا نام :- پروفیسر محمد طاہر صدیقی
کتاب کا نام :- ریاضِ نعت