وہ تو الطاف پہ مائل ہیں عدو کی بھی طرف

وہ تو الطاف پہ مائل ہیں عدو کی بھی طرف

کیوں نہ ہو لطف و کرم میری طرف تیری طرف

---

سفرِ خامۂ شاعر سوئے سطرِ مدحت

’’سطرِ مدحت کا سفر شہرِ مدینہ کی طرف‘‘

---

میرے عصیاں مری رسوائی کا ساماں نہ بنیں

اے شفاعت کے امیں! رکھنا مجھے اپنی طرف

---

بتکدوں میں جو پڑا آپ بھی بت جیسا تھا

پھیرا اس کفر کا رخ آپؐ نے ہی سیدھی طرف

---

میں نے دیکھا کہ مواجہ پہ سبھی کہتے ہیں

رحمتِ صلِّ علیٰ! میری طرف میری طرف

---

یہ کہاں بیتِ مقدّس نے بھی سوچا ہو گا

یوں کبھی قبلۂ امّت کی بھی بدلے گی طرف

---

جھوم اٹھا فرطِ مسرّت سے مطافِ کعبہ

سوئے کعبہ جونہی سرکارؐ نے پلٹائی طرف

---

ساری اطراف میں طاہرؔ ہے عطائوں کا ظہور

انؐ کے اکرام سے خالی نہیں کوئی بھی طرف