نعتِ حضرتؐ مری پہچان ہے سبحان اللہ
یہی دنیا ، یہی ایمان ہے سبحان اللہ
جس سے پہلےکسی تخلیق کا عنواں بھی نہ تھا
وہ مرے شعر کا عنوا ن ہے سبحان اللہ
میں گنہگار و خطا کار مگر اُس کی یاد
مہرباں مجھ پہ بہر آن ہے سبحان اللہ
جس پہ مرکوز ہیں سب نکتہ وروں کی نظریں
ایک اُمّی کا دبستان ہے سبحان اللہ
جو بنو سعد کے ریوڑ کا محافظ تھا کبھی
وہ دو عالم کا نگہبان ہے سبحان اللہ
جو چٹائی پہ جھکائے ہوئے سر بیٹھا ہے
دین و دنیا کا وہ سلطان ہے سبحان اللہ
یاد ہے بات مجھے حضرتِ صدیقہ کی
آپ کا خُلق بھی قران ہے سبحان اللہ
شاعر کا نام :- حفیظ تائب
کتاب کا نام :- کلیاتِ حفیظ تائب