قلم بہرِ مدحت اٹھانے لگے ہیں

قلم بہرِ مدحت اٹھانے لگے ہیں

مدینے سے الفاظ آنے لگے ہیں

---

کسی کو یہ بس چاند سورج لگے ہیں

ہمیں تو نبی کے دیوانے لگے ہیں

---

مدینے پہنچ کر بھلا دیں یہ باتیں

پہنچنے میں کتنے زمانے لگے ہیں

---

حضور آپ کا نام لب پہ سجا کر

مصائب کو ہم آزمانے لگے ہیں

---

یہ بس چاہتِ مصطفٰی کا اثر ہے

ہمیں دیکھو، ہم چاہے جانے لگے ہیں

---

فرشتو رکو اتنی جلدی بھی کیا ہے

وہ میرے نبی ہیں نا، آنے لگے ہیں

---

ترے آستانے کے دیوار و در بھی

ہمیں یاد بن کر ستانے لگے ہیں

---

اسیرانِ حسنِ مدینہ کو رضوان

آوازیں دے کر بلانے لگے ہیں

---

بھلا اس سے بڑھ کر کریمی بھی ہو گی

تبسم سے بھی طیبہ جانے لگے ہیں