ترے پنگھٹ سے بادل اپنی گاگر بھرنے آتے ہیں

ترے پنگھٹ سے بادل اپنی گاگر بھرنے آتے ہیں

زمانے بھر کے پیاسے پیاس عمروں کی بجھاتے ہیں

---

دلوں میں غوطہ زن ہوتی ہے گہرائی سمندر کی

کنارا ان کو ملتا ہے جو تجھ میں ڈوب جاتے ہیں

---

پرو لیتے ہیں تیری آہٹیں جو اپنی سانسوں میں

اُنہیں آفاق اپنی خانقاہوں میں بلاتے ہیں

---

سگِ دہلیز ہوں خاک قدم ہوں اُن کا منگتا ہوں

اکیلا ہوں مگر اُن سے مرے کتنے ہی ناتے ہیں

---

جمالِ مصطفےٰؐ سے منسلک ہوتی ہیں جب آنکھیں

فرشتے میرے اشکوں کی زیارت کرنے آتے ہیں

---

محبت کا تری جو میں نے دل میں گھر بنایا ہے

چراغ اُس کی منڈیروں پر اندھیرے خود جلاتے ہیں

---

بس اتنا واسطہ ہے آپؐ کے بازار سے اپنا

خریداری تو کر سکتے نہیں بولی لگاتے ہیں

---

مدینے کا علاقہ بھی مظفّر دیکھ آیا ہوں

نکلتا ہے زمیں پر چاند تارے جگمگاتے ہیں